Emily Peterson

15-19 Medi 2025

Gweminarau ar-lein

1. Beth yw Partneriaeth Pensiwn Cymru (PPC)?
   Mae PPC yn gydweithrediad o’r wyth cronfa CPLlL yng Nghymru. Fe’i sefydlwyd yn 2017 i gyfuno rheoli buddsoddiadau asedau a darparu gwell gwerth, llywodraethu a pherfformiad i gronfeydd pensiwn Cymru. Mae PPC wedi’i lywodraethu gan Gyd-bwyllgor Llywodraethu sy’n defnyddio model Gweithredwr (a ddarperir gan Waystone Management (UK) Limited) ac a gefnogir gan ymgynghorwyr allanol.

2. Beth yw “Addas i’r Dyfodol”?
   Deilliodd y fenter “Addas i’r Dyfodol” o ymgynghoriad gan Lywodraeth y DU a lansiwyd ym mis Tachwedd 2024 fel rhan o adolygiad ehangach o Bensiynau’r DU i gryfhau llywodraethu a modelau gweithredol cronfeydd buddsoddi Cynllun Pensiwn Llywodraeth Leol (CPLlL). Ei nod yw sicrhau bod yr holl asedau CPLlL yn cael eu rheoli’n llawn a bod cronfeydd yn gweithredu gyda mwy o ymreolaeth ac effeithlonrwydd.
   Cyflwynodd PPC Achos Busnes i’r Llywodraeth ddiwedd mis Chwefror 2025, i wneud achos dros barhau fel Cronfa Cymru ac, felly, parhau i wireddu’r manteision y mae’r Gronfa yn eu cynnig i Gymru. Cafodd hyn ei gymeradwyo gan Lywodraeth Cymru ym mis Ebrill 2025.

3. Beth oedd Achos Busnes “Addas i’r Dyfodol” PPC yn ei gynnig?
   Roedd achos busnes PPC, a gyflwynwyd mewn ymateb i ymgynghoriad y Llywodraeth, yn cynnig y canlynol:
   • Cadw cronfa fuddsoddi annibynnol yng Nghymru.
   • Adeiladu gallu mewnol i fodloni gofynion llywodraethu a gofynion gweithredol newydd drwy greu Cwmni Rheoli Buddsoddiadau Partneriaeth Pensiwn Cymru.
   • Cwblhau’r gwaith o drosglwyddo’r holl asedau i ddod o dan reolaeth y gronfa.
   • Gwella tryloywder, atebolrwydd a gwerth am arian

4. Beth yw “Prosiect Snowdon”?
   Menter fewnol PPC yw Prosiect Snowdon, sy’n cynnwys Swyddogion Adran 151 a Uwch-swyddogion Cronfeydd Pensiwn o’r wyth Cronfa Bensiwn CPLlL yng Nghymru, gyda chefnogaeth ymgynghorwyr PPC, i weithredu’r cynigion yn Achos Busnes PPC.

5. Sut y bydd hyn yn effeithio ar aelodau’r Cynllun Pensiwn Llywodraeth Leol?
   Ni fydd unrhyw newid i’ch buddion pensiwn, gan gynnwys unrhyw Gyfraniadau Gwirfoddol Ychwanegol a allai fod gennych. Mae’r newidiadau rydyn ni’n eu gweithredu yn ymwneud â sut mae asedau pensiwn yn cael eu rheoli a’u buddsoddi, nid am y buddion rydych chi’n eu derbyn. Y nod yw sicrhau bod eich pensiwn yn cael ei reoli’n fwy effeithlon a chynaliadwy.

6. Sut y bydd hyn yn effeithio ar Gyflogwyr?
   Gall Cyflogwyr ddisgwyl y canlynol:
   • Trefniadau cryf parhaus o ran llywodraethu a goruchwylio buddsoddiadau pensiwn.
   • Potensial ar gyfer mwy o effeithlonrwydd cost a chanlyniadau buddsoddi gwell.
   • Dim newid i gyfrifoldebau na phrosesau cyfrannu’r cyflogwr.

7. A fydd hyn yn newid pwy sy’n gweinyddu’r cronfeydd pensiwn?
   Na fydd. Bydd wyth Cronfa Bensiwn Cymru yn aros gyda’r Awdurdodau Gweinyddol ac yn cadw perchnogaeth leol o benderfyniadau strategol, ond byddant yn gweld eu penderfyniadau buddsoddi yn cael eu gweithredu gan Gwmni Rheoli Buddsoddiadau PPC. Bydd PPC yn parhau i ddefnyddio rheolwyr cronfeydd allanol, ond gyda goruchwyliaeth well ac o bosibl mwy o alluoedd mewnol i fodloni gofynion newydd.

8. Beth yw manteision y cynnig hwn?
   • Llywodraethu cryfach ac atebolrwydd.
   • Gwell perfformiad buddsoddiadau trwy raddfa ac arbenigedd.
   • Arbedion cost trwy gyfuno ac effeithlonrwydd gweithredol.
   • Alinio â disgwyliadau’r Llywodraeth, gan sicrhau cynaliadwyedd hirdymor.

9. Beth yw’r camau nesaf?
   Mae Llywodraeth y DU wedi rhoi cyfarwyddyd cadarnhaol i PPC i symud ymlaen a chreu Cwmi Rheoli Buddsoddiadau PPC. Bydd gwaith yn parhau ar gyflymder i sicrhau bod hyn wedi’i gwblhau o fewn amserlenni disgwyliedig y Llywodraeth.

10. O ble allaf i gael rhagor o wybodaeth?
    Gallwch ddarllen cyflwyniad llawn Cynllun Busnes PPC a Addas i’r Dyfodol ar wefan Partneriaeth Pensiwn Cymru neu gysylltu â’ch gweinyddwr cronfa bensiwn leol.

Beth yw’r Dangosfwrdd Pensiwn?

Mae’r Adran Gwaith a Phensiynau, drwy’r Gwasanaeth Arian a Phensiynau yn creu Dangosfwrdd Pensiwn y gall holl ddinasyddion y DU ei ddefnyddio am ddim i weld gwybodaeth am eu pensiwn yn ddiogel, ar-lein ac mewn un lle, hyd yn oed os ydynt yn byw tramor.

Mae angen i’r holl gynlluniau pensiwn yn y DU, gan gynnwys y Cynllun Pensiwn Llywodraeth Leol (CPLlL) gysylltu â’r ecosystem dangosfwrdd i ddarparu gwybodaeth i aelodau pensiwn mewn ffordd ddiogel. Mae’r prosiect yn cael ei reoli gan y Rhaglen Dangosfwrdd Pensiynau – gallwch ddarllen amdani ar ei gwefan.

Dolen allanol i’r Rhaglen Dangosfwrdd Pensiynau yw hon, ac nid yw ar gael yn Gymraeg:

Dangosfyrddau Pensiwn

Pam mae’r Llywodraeth am sefydlu Dangosfwrdd Pensiwn?

Mae’r nod yn syml – maent am i’r diwydiant pensiynau ddarparu gwybodaeth glir a syml am arbedion pensiwn amryfal unigolyn, gan gynnwys eu pensiwn y wladwriaeth. Maent hefyd am i’r diwydiant helpu dinasyddion i ailgysylltu ag unrhyw botiau pensiwn coll sydd ganddynt.

Pryd y bydd yn cael ei lansio?

Bwriadwyd lansio’r dangosfyrddau fesul cam. Fodd bynnag, ym mis Mawrth 2023 cyhoeddwyd datganiad ysgrifenedig gan y Gweinidog a oedd yn awgrymu y gallant gael eu lansio yn hwyrach yn y dyfodol.

Mae hyn bellach wedi cael ei gadarnhau o fewn rheoliadau newydd, Rheoliadau Dangosfyrddau Pensiwn (Diwygiad) 2023, a ddaeth i rym ym mis Awst 2023. Mae ‘dyddiadau cyflwyno fesul cam’ hefyd wedi cael eu rhyddhau. Mae’n rhaid i gynlluniau’r sector cyhoeddus fel y CPLlL gysylltu erbyn 31 Hydref 2025.

Dolen allanol i’r Datganiad Ysgrifenedig Gan y Gweinidog yw hon ac nid yw ar gael yn Gymraeg:

Written Ministerial Statement

Oes angen i aelodau’r CPLlL wneud unrhyw beth?

Nac oes. Ar hyn o bryd, cynlluniau, gweinyddwyr a chyflogwyr sy’n gyfrifol am sicrhau bod data aelodau’n gywir ac yn gyfredol wrth i’r diwydiant weithio ar y fframwaith technegol a thechnolegol ar gyfer cyflwyno’r dangosfwrdd.

Mae’r Adran Ffyniant Bro, Tai a Chymunedau wedi llunio dogfen cwestiynau cyffredin er mwyn helpu aelodau i ddeall dyfarniad McCloud ac os effeithir ar eu pensiynau.