Os ydych yn gadael cyflogaeth â buddion gohiriedig cyn eu derbyn, mae’r buddion goroeswr sy’n daladwy’n dibynnu ar y cyfnod pan adawsoch y cynllun.
Os gadawsoch y cynllun ar 31 Mawrth 2008 neu cyn hynny, bydd pensiwn goroeswr yn daladwy’n awtomatig i’ch cymar neu’ch partner sifil cofrestredig. Os gadawsoch y cynllun ar 1 Ebrill 2008 neu ar ôl hynny, mae pensiwn goroeswr hefyd yn daladwy’n awtomatig i’ch partner cyd-fyw cymwys, yn destun amodau cymhwyso penodol.
Mae pensiwn goroeswr yn cael ei gyfrifo fel a ganlyn:
Os gadawsoch ar 31 Mawrth 2014 neu cyn hynny
1 rhan o 160 x eich cyflog terfynol x yr aelodaeth mae’r pensiwn gohiriedig yn seiliedig arni
Os gadawsoch ar 1 Ebrill 2014 neu ar ôl hynny
1 rhan o 160 x eich cyflog terfynol x unrhyw aelodaeth yn y cynllun hyd at 31 Mawrth 2014;
ynghyd ag 1 rhan o 160 x tâl pensiynadwy x eich aelodaeth yn y cynllun ar ôl 31 Mawrth 2014;
ynghyd â 49 rhan o 160 o swm unrhyw bensiwn a gredydwyd i’ch cyfrif pensiwn ar ôl trosglwyddo hawliau pensiwn (os yw’n berthnasol)
Sylwer – os byddwch yn priodi ar ôl i chi ymddeol, efallai y caiff y pensiwn ei gyfrifo ar lai o aelodaeth.
Amodau Cymhwyso Partner Cyd-fyw
Mae pensiwn goroeswr, fel a gyfrifwyd uchod, yn cael ei dalu i bartner cyd-fyw ar yr amod bod yr holl amodau canlynol wedi bod yn berthnasol am gyfnod parhaus o leiaf 2 flynedd cyn i chi farw:
- Mae’r ddau ohonoch, nawr ac wedi bod, yn rhydd i briodi â’ch gilydd neu lunio partneriaeth sifil â’ch gilydd
- Rydych yn byw gyda’ch gilydd fel gŵr a gwraig neu bartneriaid sifil
- Nid oes yr un ohonoch yn byw gyda rhywun arall fel gŵr a gwraig neu bartneriaid sifil
- Naill ai mae’ch partner cyd-fyw yn ariannol ddibynnol arnoch neu mae’r ddau ohonoch yn ariannol ryngddibynnol ar eich gilydd.
Mae’ch partner yn ariannol ddibynnol arnoch os mai chi sy’n ennill yr incwm mwyaf. Ystyr ‘ariannol ryngddibynnol’ yw’ch bod yn dibynnu ar eich arian ar y cyd i gynnal eich safonau byw. Nid yw’n golygu bod yn rhaid i chi gyfrannu’n gyfartal. Er enghraifft, os yw incwm eich partner yn fwy o lawer na’ch un chi, gall fod yn talu’r morgais a’r rhan fwyaf o’r biliau, ac efallai’ch bod chi’n talu am y siopa wythnosol.
Sylwer – bydd y swm sy’n daladwy i’ch partner cyd-fyw’n llai na’r hyn sy’n daladwy i briod neu bartner sifil cofrestredig os ydych wedi dewis peidio â thalu cyfraniadau ychwanegol o ran unrhyw aelodaeth cyn 6 Ebrill 1988.
