Os ydych yn marw wrth wneud swydd fel aelod o Gynllun Pensiwn Llywodraeth Leol (LGPS), yn amodol ar y meini prawf cymhwyso a fanylir, bydd y budd-daliadau canlynol yn daladwy:
- Cyfandaliad grant marwolaeth, cyfwerth â dwywaith tâl cyfartalog eich gyrfa, ni waeth pa mor hir yw’ch aelodaeth o’r LGPS.
Os byddwch yn marw, caiff Cronfa Bensiwn DASA ei harwain gan unrhyw enwebiad ond, mae’n cadw’r disgresiwn llwyr i benderfynu i bwy y dylid talu unrhyw gyfandaliad grant marwolaeth sy’n daladwy yn ôl rheoliadau’r LGPS ac ym mha gyfrannau.
Os nad ydych wedi enwi buddiolwr, neu os hoffech ddiweddaru’r manylion sydd wedi’u cofnodi, gallwch lawrlwytho Ffurflen Mynegi Dymuniad Grant Marwolaeth. Caiff manylion y buddiolwr a enwyd gennych eu cynnwys ar eich datganiad blynyddol o fuddion ac mae’n bwysig i chi wirio’r rhain a sicrhau eu bod yn gywir.
- Pensiwn goroeswr, yn daladwy i wraig weddw, gŵr gweddw neu bartner sifil cofrestredig.
Telir pensiwn tymor byr ar gyfradd flynyddol sy’n gyfwerth â thâl cyfartalog eich gyrfa am 3 mis. Os oes plant cymwys dibynnol, caiff y pensiwn hwn ei dalu am 6 mis.
Ar ôl 3 mis/6 mis, telir pensiwn tymor hir am oes sy’n gyfwerth, yn fras, â hanner y pensiwn byddech wedi’i dderbyn pe byddech wedi ymddeol oherwydd salwch ar ddyddiad eich marwolaeth.
Sylwer, nad yw rheoliadau’r LGPS yn caniatáu i bensiwn gael ei dalu i bartner cyd-fyw enwebedig dan gynllun y cynghorwyr.
- Mae pensiynau plant yn daladwy hefyd os oes gennych unrhyw blant sy’n gymwys.
Mae’r swm i’w dalu’n dibynnu ar nifer y plant sydd gennych a thelir cyfrannau cyfartal ar ran pob plentyn cymwys.
Ystyrir bod plentyn yn gymwys os yw’n ddibynnol, yn llwyr neu’n bennaf, arnoch chi ar ddyddiad eich marwolaeth ac os yw’n bodloni’r amodau canlynol:
- mae’n iau na 18 oed
- mae’n 18 oed neu’n hŷn ond yn iau na 23 oed ac mae mewn addysg amser llawn neu’n derbyn hyfforddiant galwedigaethol
- mae’n anabl yn ôl diffiniad Deddf Cydraddoldeb 2010
Gellir effeithio ar swm y budd-dal sy’n daladwy i blentyn cymwys gan unrhyw enillion mae’n eu derbyn sy’n uwch na lefel benodol yn ystod ei amser ar gwrs hyfforddiant cymeradwy.
Telir y pensiwn cyhyd ag y bydd y plentyn (plant) yn parhau’n gymwys.
