Mae’r Cynllun Pensiwn Llywodraeth Leol (LGPS) yn gynllun pensiwn statudol a ariannwyd ac mae talu ei fudd-daliadau yn warantedig yn ôl y gyfraith.
Mae’r Cynllun Pensiwn Llywodraeth Leol (LGPS) ar gael i holl gynghorwyr Cyngor Sir neu Gyngor Bwrdeistref Sirol yng Nghymru sy’n cael cynnig aelodaeth o’r cynllun o dan gynllun lwfansau’r cyngor ac sy’n iau na 75 oed. Mae’r rhai sy’n cael cynnig aelodaeth yn Gynghorwyr Cymwys.
Os ydych wedi cael cynnig aelodaeth o’r Cynllun, eich penderfyniad chi yw ymaelodi â’r cynllun ai peidio. Os byddwch yn penderfynu ymaelodi, byddwch yn aelod o’r LGPS o gychwyn y cyfnod cyflog cyntaf ar ôl i ni dderbyn eich opsiwn.
Os byddwch yn dymuno ymaelodi â’r cynllun, mae’n bwysig eich bod yn cwblhau ac yn dychwelyd y Ffurflen Opsiynau. Ar ôl i ni dderbyn eich ffurflen, sefydlir eich cofnod ac anfonir hysbysiad o’ch aelodaeth o’r cynllun, ynghyd ag Arweiniad i’r Cynllun a dogfennau perthnasol eraill atoch. Dylech hefyd wirio eich taliadau lwfans er mwyn sicrhau bod cyfraniadau pensiwn yn cael eu didynnu.
Sylwer ei bod yn bwysig iawn cwblhau Ffurflen Mynegi Dymuniad Grant Marwolaeth wrth ddechrau gyda’r LGPS, fel y caiff y grant marwolaeth a fydd yn daladwy ar eich marwolaeth ei dalu yn ôl eich dymuniad.
