Os ydych yn marw yn eich swydd, telir budd-daliadau goroeswr am oes i’ch priod neu’ch partner sifil a byddant yn cynyddu bob blwyddyn yn gyson â’r costau byw.
Cyfrifir y pensiwn i’w dalu fel a ganlyn:
- 1 rhan o 160 x eich tâl terfynol x unrhyw aelodaeth yn y cynllun hyd at 31 Mawrth 2014; ynghyd â
- 1 rhan o 160 x tâl pensiynadwy x eich aelodaeth yn y cynllun ar ôl 31 Mawrth 2014; ynghyd â
- 49 rhan o 160 o swm unrhyw bensiwn a gredydwyd i’ch cyfrif pensiwn ar ôl trosglwyddo hawliau pensiwn (os yw’n berthnasol); ynghyd â
- pensiwn cyfwerth ag 1 rhan o 160 o’ch tâl pensiynadwy rhagdybiedig ar gyfer pob blwyddyn o aelodaeth y byddech wedi’i chronni o’ch dyddiad marwolaeth i’ch Oedran Pensiwn Arferol (NPA).
Mae pensiwn goroeswr, fel a gyfrifwyd uchod, hefyd yn cael ei dalu i bartner cyd-fyw ar yr amod bod yr holl amodau canlynol wedi bod yn berthnasol am gyfnod parhaus o 2 flynedd o leiaf cyn eich marwolaeth:
- Mae’r ddau ohonoch, nawr ac wedi bod, yn rhydd i briodi â’ch gilydd neu lunio partneriaeth sifil â’ch gilydd
- Rydych yn byw gyda’ch gilydd fel gŵr a gwraig neu bartneriaid sifil
- Nid oes yr un ohonoch yn byw gyda rhywun arall fel gŵr a gwraig neu bartneriaid sifil
- Naill ai mae’ch partner cyd-fyw yn ddibynnol yn ariannol arnoch neu mae’r ddau ohonoch yn rhyngddibynnol yn ariannol ar eich gilydd.
Mae’ch partner yn ddibynnol yn ariannol arnoch os mai chi sy’n ennill yr incwm mwyaf. Ystyr ‘rhyngddibynnol yn ariannol’ yw’ch bod yn dibynnu ar eich arian ar y cyd i gynnal eich safonau byw. Nid yw’n golygu bod yn rhaid i chi gyfrannu’n gyfartal. Er enghraifft, os yw incwm eich partner yn fwy o lawer na’ch un chi, gall fod yn talu’r morgais a’r rhan fwyaf o’r biliau, ac efallai’ch bod chi’n talu am y siopa wythnosol.
Sylwer, bydd y swm sy’n daladwy i’ch partner cyd-fyw’n llai na’r hyn sy’n daladwy i briod neu bartner sifil cofrestredig os ydych wedi dewis peidio â thalu cyfraniadau ychwanegol o ran unrhyw aelodaeth cyn 6 Ebrill 1988.
