Mae cyfraniadau pensiwn ychwanegol yn ffordd o ychwanegu at eich pensiwn yn uniongyrchol trwy Gronfa Bensiwn Dinas a Sir Abertawe – rydych yn talu swm penodol, ac mae hynny’n ychwanegu swm penodol at eich pensiwn. Gallwch ddefnyddio CPY i brynu pensiwn ychwanegol oherwydd eich bod am wneud hynny, neu er mwyn dal i fyny yn dilyn seibiant lle nad ydych wedi talu cyfraniadau, trwy brynu pensiwn coll yn ôl. Mae uchafswm o ran faint gallwch ychwanegu at eich pensiwn ( £7,316 ar hyn o bryd ond bydd hyn yn newid pob blwyddyn yn unol â chost byw.)
Prynu Pensiwn Ychwanegol
Manteision
- Mae’r CPY yn eich galluogi i gronni pensiwn ychwanegol o fewn eich pensiwn Cynllun Pensiwn Llywodraeth Leol (CPLlL). Gallwch ddefnyddio hyn er mwyn cael buddion ymddeoliad ychwanegol.
- Mae’r cyfraniadau rydych yn eu gwneud yn daliadau treth effeithlon gan eich bod yn talu’r arian yn uniongyrchol o’ch cyflog cyn talu treth. Gallwch dalu am y pensiwn ychwanegol hwn yn rheolaidd dros nifer o flynyddoedd yn uniongyrchol o’ch tâl neu fesul cyfandaliad (naill ai o’ch tâl neu yn uniongyrchol i Gronfa Bensiwn Dinas a Sir Abertawe). Yr isafswm amser y gallwch ymestyn taliadau CPY yw dros 12 mis.
- Gallwch ddewis stopio talu CPY ar unrhyw adeg trwy roi gwybod i ni’n ysgrifenedig. Byddwch yn cael eich credydu â’r pensiwn ychwanegol yr ydych wedi ei dalu ar adeg rhoi’r gorau i wneud y taliadau.
Lefel gyfrannu
Mae’r gost yn dibynnu ar nifer o bethau – eich oed, rhyw, cyfnod talu a faint o bensiwn ychwanegol yr ydych eisiau ei brynu. Gallwch dalu’n fisol neu fel cyfandaliad.
Er enghraifft, mae Christine yn 38 oed ac eisiau prynu £2,000 o bensiwn blynyddol ychwanegol. Byddai hyn yn costio:
- £18,400.00 fel cyfandaliad
- £801.40 y mis os yw hi’n talu dros 2 flynedd.
I gael gwybodaeth am faint bydd CPY yn eu costio, defnyddiwch y gyfrifiannell CPY
Cymryd eich arian
Os ydych chi’n dewis ymddeol yn gynnar (cyn eich Oedran Pensiwn Arferol) bydd y pensiwn ychwanegol yr ydych wedi ei brynu yn cael ei ostwng ar gyfer taliadau cynnar. Os ydych yn dewis cymryd eich pensiwn ar ôl eich Oedran Pensiwn Arferol bydd unrhyw bensiwn ychwanegol yr ydych yn ei brynu’n cynyddu oherwydd ei fod yn cael ei dalu’n hwyrach.
Pan fyddwch yn ymddeol, gallwch ddewis cyfnewid peth o’r pensiwn ychwanegol yr ydych wedi ei brynu am gyfandaliad arian parod di-dreth yn yr un modd â’ch prif bensiwn CPLlL.
Os ydych yn marw wrth wasanaethu ni fydd unrhyw fuddion ychwanegol o’ch contract CPY yn daliadwy. Mae hyn oherwydd bod y pensiwn ychwanegol yr ydych yn ei brynu ar eich cyfer chi’n unig.
Os ydych yn penderfynu dechrau trefniant CPY ac yn dewis talu’r CPY yn fisol bydd yn rhaid i chi gael archwiliad meddygol ar eich traul eich hun a darparu tystysgrif iechyd gweddol dda cyn y gallwch brynu pensiwn ychwanegol.
Prynu Pensiwn Coll yn Ôl
Mae hyn yn ffordd dda o ddal i fyny â phensiwn coll yn dilyn seibiant, megis absenoldeb rhieni di-dal. Darllenwch yr Is-adran ar Absenoldeb o’r Gwaith am fwy o wybodaeth ynghylch pa absenoldebau sy’n gymwys.
Gweithredu streic a phensiwn
Gallwch brynu pensiwn “coll” yn ôl os, er enghraifft, ydych wedi bod ar streic, ond ni fyddai’ch rheolwr yn rhannu’r gost. Bydd yn rhaid i chi dalu’r holl gostau sy’n gysylltiedig â hyn.
Os ydych yn prynu pensiwn “coll” yn ôl trwy’r CPY nid oes angen tystysgrif iechyd gweddol dda arnoch.
Sut mae gwneud cais
I ganfod faint bydd CPY yn ei gostio, defnyddiwch y gyfrifiannell CPY
Unwaith yr ydych wedi mewnbynnu eich manylion i’r gyfrifiannell ac wedi derbyn pris, os ydych eisiau parhau, bydd angen i chi lenwi ffurflen gais ar y dudalen gyfrifiannell a’i dychwelyd i’r cyfeiriad canlynol:
Is-adran Bensiynau
Canolfan Ddinesig
Heol Ystumllwynarth
ABERTAWE
SA1 3SN
