Os ydych yn newid eich trefniadau gwaith, gall gael effaith ar eich buddion pensiwn yn y Cynllun Pensiwn Llywodraeth Leol (CPLlL). Os ydych yn penderfynu gweithio llai o oriau neu’n derbyn swydd â chyflog is, efallai yr effeithir ar eich buddion pensiwn.
Sut yr effeithir ar eich pensiwn os ydych yn newid eich oriau?
Mae eich pensiwn blynyddol o dan y cynllun Cyfartaledd Cyflog Gyrfa wedi’i Adbrisio (CCGA) o 1 Ebrill 2014 yn seiliedig ar y cyflog pensiynadwy gwirioneddol rydych wedi derbyn yn ystod blwyddyn y Cynllun (o 1 Ebrill i 31 Mawrth) a’r gyfradd cronni o 1/49fed (neu 1/98ain os yn yr adran 50/50). Po fwyaf eich cyflog pensiynadwy gwirioneddol, mwyaf y bydd eich croniad pensiwn yn ystod blwyddyn y cynllun, ond os byddwch yn dewis gweithio llai o oriau, bydd eich cyflog pensiynadwy gwirioneddol yn llai, sy’n golygu y bydd eich croniad pensiwn yn llai.
Os daethoch yn aelod ar neu cyn 31 Mawrth 2014, NI fydd unrhyw newid yn eich oriau gwaith o hyn ymlaen yn effeithio ar y buddion rydych wedi’u cronni hyd at 31 Mawrth 2014 h.y. eich buddion Cyflog Terfynol. Pan fyddwch yn ymddeol, bydd y buddion hyn yn seiliedig ar eich cyflog pensiynadwy cyfwerth amser llawn (ac eithrio unrhyw oramser nad yw’n gytundebol).
Enghraifft
Ar hyn o bryd mae Siân yn gweithio’n amser llawn ac yn cyfrannu dan Brif Adran (1/49fed) y cynllun. Mae’n ystyried lleihau ei horiau i 29.60 yr wythnos (4 diwrnod yr wythnos). Ei chyflog amser llawn ar hyn o bryd yw £18,000, a fyddai wedyn yn gostwng i £14,400 pe bai’n lleihau ei horiau. Os bydd hyn yn digwydd, effeithir ar groniad pensiwn Siân fel a ganlyn.
Pensiwn CCGA wedi’i gredydu yn ystod blwyddyn y cynllun fel aelod amser llawn:
1/49fed x £18,000 = £367.35 pensiwn blynyddol
Pensiwn CCGA wedi’i gredydu yn ystod blwyddyn y cynllun os yw’n gweithio 29.60 awr yr wythnos (4 diwrnod yr wythnos). (29.60 / 37.00 x £18,000 = £14,400)
1/49fed x £14,400 = £293.88 pensiwn blynyddol
£367.35 – £293.88 = gwahaniaeth o £73.47 yn y croniad pensiwn blynyddol ar gyfer blwyddyn y cynllun dan y cynllun Pensiwn CCGA wedi’i gredydu yn ystod blwyddyn y cynllun Cyfartaledd Cyflog Gyrfa wedi’i Adbrisio (CCGA)
Beth fydd yn digwydd os caiff eich cyflog ei leihau neu ei gyfyngu?
Os daethoch yn aelod ar neu cyn 31 Mawrth 2014, bydd gennych yr opsiwn i seilio’ch buddion Cyflog Terfynol ar gyflog pensiynadwy unrhyw un o’r tair blynedd diwethaf (os yn uwch na’r flwyddyn ddiwethaf), neu gallwch ddewis cyfartaledd o gyflog unrhyw 3 blynedd olynol o fewn y 13 blynedd diwethaf o gyflogaeth (yn gorffen 31 Mawrth). Fodd bynnag, bydd y pensiwn rydych yn ei gronni o 1 Ebrill, 2014 dan y Cynllun Cyfartaledd Cyflog Gyrfa wedi’i Adbrisio, yn llai o ganlyniad i unrhyw ostyngiad / gyfyngiad yn eich tâl pensiynadwy.
Beth fydd yn digwydd os dewiswch gymryd swydd sy’n talu llai o gyflog?
Bydd y pensiwn rydych wedi’i gronni yn erbyn eich cyflogaeth flaenorol yn cael eu cyfuno’n awtomatig gyda’ch cyflogaeth weithredol, oni bai eich bod yn dewis cadw’r buddion ar wahân o fewn 12 mis.
Wrth symud i swydd gyda chyflog is, byddwch yn cronni llai o bensiwn o’r diwrnod rydych yn dechrau yn eich swydd newydd, gan y bydd eich croniad pensiwn ar ôl hynny’n cael ei seilio ar eich cyflog pensiynadwy newydd. Bydd hefyd yn cael effaith ar unrhyw ychwanegiad salwch posib a ddyfernir a’r grant marwolaeth sy’n daladwy os byddwch yn marw.
Pa fuddion eraill yr effeithir arnynt?
Os byddwch yn ymddeol oherwydd salwch parhaol, efallai y byddwch yn derbyn ychwanegiad, gan ddibynnu ar ddifrifwch eich salwch, sy’n seiliedig ar eich Cyflog Pensiynadwy Tybiedig (CPT)¹ ar eich dyddiad gadael.
Trwy leihau eich oriau gweithio’n wirfoddol, bydd unrhyw ychwanegiad salwch yn llai yn ôl cyfran o ganlyniad i hyn. Am ragor o wybodaeth am y broses salwch, cyfeiriwch at y ffeithlen Salwch.
Os byddwch yn marw fel aelod gweithredol o’r cynllun, bydd cyfandaliad grant marwolaeth o 3 gwaith eich CPT¹ yn cael ei dalu’n unol â’ch Ffurflen Mynegi Dymuniad Grant Marwolaeth, neu os nad oes mynegi ant o ddymuniad, eich Ystad. Os ydych yn gweithio rhan-amser, bydd eich CPT yn llai yn ôl cyfran, sy’n golygu y bydd eich grant marwolaeth yn llai hefyd. Os ydych yn dymuno cynyddu’ch Yswiriant Bywyd, cysylltwch â’r Gronfa Bensiwn.
¹cyfartaledd o’r tâl pensiynadwy rydych wedi’i dderbyn o fewn y 3 mis cyflawn (neu 12 wythnos os telir yn wythnosol) cyn eich dyddiad gadael / dyddiad marwolaeth: wedi’i uwchraddio a’i fynegi fel swm blynyddol
Ym mhle y gallwch chi ddod o hyd i ragor o wybodaeth?
Dim ond arweiniad cyffredinol a roddir gan y ffeithlen hon; os oes angen rhagor o wybodaeth arnoch, cysylltwch â Chronfa Bensiwn Dinas a Sir Abertawe:
Ffôn: 01792 636655
E-bost: pensions@abertawe.gov.uk
Ymwadiad
Nid yw’r Gronfa Bensiwn yn gallu darparu unrhyw gyngor ariannol. Ar ôl i chi ddarllen y ffeithlen hon, efallai y bydd angen i chi ofyn am gyngor Ariannol Annibynnol er mwyn i chi allu gwneud penderfyniad gwybodus.
Efallai bydd y cyrff hyn yn gallu’ch helpu:
Diduedd: https://unbiased.co.uk/
MoneyHelper: https://www.moneyhelper.org.uk/en/pensions-and-retirement/taking-your-pension/find-a-retirement-adviser
