Steph Rutt

Cydnabyddir cronfa bensiwn Cyngor Abertawe fel y cynllun llywodraeth leol gorau yn y DU am fuddsoddiad cynaliadwy.

Dros y blynyddoedd diwethaf, cymerwyd camau allweddol i leihau ôl troed carbon y gronfa drwy dorri swm yr arian a fuddsoddir mewn cwmnïau â dwysedd carbon uchel.

Nawr, mae’r gronfa gwerth £2.1 biliwn y mae rheolwyr Cyngor Abertawe’n ei rheoli ar gyfer Abertawe, Castell-nedd Port Talbot a nifer o gyflogwyr eraill yn yr ardal, wedi’i chydnabod yng ngwobrau Buddsoddi Fforwm Cronfeydd Pensiwn Awdurdodau Lleol sy’n dathlu llwyddiant arbennig cronfeydd pensiwn a darparwyr gwasanaethau.

Abertawe enillodd y wobr am y gronfa â’r Ymagwedd Orau at Fuddsoddi Cynaliadwy yn y DU.

Meddai Clive Lloyd, Dirprwy Arweinydd Cyngor Abertawe a Chadeirydd Pwyllgor Cronfa Bensiwn y cynllun, “Ystyrir Gwobrau Buddsoddi Fforwm Cronfeydd Pensiwn Awdurdodau Lleol fel arwydd o ragoriaeth ym maes darpariaeth pensiwn felly mae’n bleser gennyf ddweud bod y gwaith a wneir yn Abertawe’n cael ei gydnabod.

“Ni oedd y cynllun pensiwn llywodraeth leol gyntaf yng Nghymru – ymhlith nifer bach yn y byd – i gomisiynu adolygiad o’n portffolio buddsoddi ecwiti i ganfod graddau ein buddsoddiadau carbon a thanwydd ffosil.

“Ers hynny rydym wedi symud gwerth £0.5 biliwn o asedau i gronfeydd olrhain mynegai carbon isel gan leihau lefel o fuddsoddiadau mewn diwydiannau sy’n gysylltiedig â charbon ymhellach.

“Byddwn yn parhau â’r ymagwedd hon a byddwn yn lleihau ein cyswllt â buddsoddiadau mewn cwmnïau tanwydd ffosil ymhellach.

“Hoffwn ddiolch i’n pwyllgor y gronfa bensiwn a’n hymgynghorwyr sydd wedi bod yn gweithio’n galed i leihau ôl troed carbon y gronfa er mwyn gwneud hyn yn bosib.”

Mae un o gronfeydd pensiwn llywodraeth leol mwyaf Cymru wedi dechrau lleihau ei hôl troed carbon trwy leihau cyfanswm yr arian y mae’n ei fuddsoddi mewn cwmnïau gyda dwysedd carbon uchel.

Mae Cynllun Pensiwn Llywodraeth Leol Dinas a Sir Abertawe’n rheoli cronfeydd gwerth £2.1bn ar gyfer cynghorau yn Abertawe a Chastell-nedd Port Talbot yn ogystal â nifer o gyflogwyr eraill yn yr ardal.

Erbyn hyn, mae’r gronfa wedi dechrau lleihau ei lefel o fuddsoddiadau, sydd eisoes yn isel, mewn diwydiannau sy’n gysylltiedig â charbon.

Erbyn diwedd y mis hwn (Gorffennaf 2019) caiff asedau gwerth £0.5bn eu trosglwyddo i gronfa olrhain mynegai carbon isel yn dilyn rhaglen hyfforddiant ymddiriedolwyr, felly mabwysiadwyd Polisi Llywodraethu Cymdeithasol, Amgylcheddol (LlCA) o ganlyniad, a oedd yn canolbwyntio ar leihau ei ôl troed carbon.

Mae newid wedi’i wneud i reolau’r cynllun fel bod buddion goroeswr sy’n daladwy i ŵr/gwraig neu bartner sifil o’r un rhyw yn gyfartal â’r rheiny a delir i wraig weddw aelod gwrywaidd. 

Pam mae’r newid wedi’i wneud?

Mae’r newid wedi’i wneud o ganlyniad i ddyfarniad y Goruchaf Lys (Walker yn erbyn Innopsec) a gafodd fod gan ŵr Mr Walker hawl i’r un buddion a’r rheiny a fyddai wedi cael eu talu pe bai Mr Walker wedi gadael gwraig weddw mewn priodas o’r ddau ryw.

Pam mae hyn yn berthnasol i Gynllun Pensiwn Llywodraeth Leol?

Mae’r llywodraeth yn credu mai goblygiad y dyfarniad hwn i holl gynlluniau pensiwn gwasanaethau cyhoeddus, gan gynnwys Cynllun Pensiwn Llywodraeth Leol, yw y dylai partneriaid sifil sy’n goroesi neu wŷr/gwragedd o’r un rhyw sy’n goroesi gael buddion sy’n gyfartal â’r rheiny a fyddai’n cael eu gadael i wraig weddw aelod gwrywaidd. 

Pryd mae’r newid yn dod i rym?

Bydd y newid yn cael ei ôl-ddyddio i’r dyddiad pan gyflwynwyd partneriaethau sifil a phriodasau o’r un rhyw, sef 5 Rhagfyr 2005 yn achos partneriaethau sifil a 13 Mawrth 2014 yn achos priodasau o’r un rhyw.

Mae hyn yn golygu, os yw aelod o Gynllun Pensiwn Llywodraeth Leol wedi marw gan adael partner sifil neu ŵr/gwraig o’r un rhyw sy’n goroesi, y bydd angen adolygu’r pensiwn sy’n cael ei dalu i’r goroeswr a thalu unrhyw symiau ychwanegol, lle bo hynny’n berthnasol. Rydym wrthi’n adolygu effaith y newid hwn a byddwn yn cysylltu â phartneriaid sifil a gwŷr/gwragedd o’r un rhyw yr effeithir arnynt maes o law.

Rhoddir ystyriaeth i’r newid yn awtomatig mewn perthynas â buddion goroeswyr a delir i bartneriaid sifil a gwŷr/gwragedd o’r un rhyw yn y dyfodol.